Маймыл шешегіне байланысты алғашқы ел міндетті карантин енгізді

Бельгия маймыл шешегіне байланысты карантин жариялады, – деп хабарлайды Basnews.kz тілшісі Daily Mail басылымына сілтеме жасап.

Бельгияда маймыл шешегінің 3 жағдайы тіркелгеннен кейін елдің денсаулық сақтау органдары 21 күндік карантин енгізді, ал жұқтырған науқастар енді 3 апта бойы өзін-өзі оқшаулауға мәжбүр. Науқастармен байланыста болған адамдар әлі оқшауланған жоқ, бірақ оларға ауру белгісі байқалғанда дереу хабарлауға шақырды.

Айта кетейік, маймыл шешегі Ұлыбританияда, Испанияда, АҚШ-та және Португалияда тіркелген болатын.

Бұған дейін Дүниежүзілік денсаулық сақтау ұйымының (ДДСҰ) өкілдері Ұлыбританияға келген адамдар арасында маймыл шешегінің таралу қаупін бағалаған еді. Ал Перу үкіметі маймыл шешегі өршуіне байланысты дабыл қақты.

Маймыл шешегі адамдарға жануарлардан беріледі. Бұл – 1970-жылдары Конго Демократиялық Республикасында тіркелген сирек кездесетін вирусты зооноз ауруы.

Симптомдарына бас ауруы және тері бөртпелері жатады. Бөртпе беттен басталып, дененің қалған бөлігіне таралады.