ШҚО – металлургия саласындағы нақты өндірістік активтердің шоғырлануы бойынша Қазақстандағы көшбасшы
Шығыс Қазақстан облысы зауыт аумақтарынан жүзеге асырылған нақты жөнелтілімдер көлемі бойынша ел өңірлері арасында жетекші орынға шықты. Бұл туралы БҰҰ әдіснамасына негізделген рейтингке сілтеме жасаған exclusive.kz сайты хабарлады.
Талдау нәтижелері көрсеткендей, экспорт көрсеткіштері мен кедендік декларациялар көбінесе нақты өндіріс көлемін толық бейнелей бермейді. Әсіресе бұл жағдай Алматы және Астана қалаларына тән.
– Статистика Қазақстанның барлық өңірлері үшін әділ рейтинг жасауға мүмкіндік берді. Нақты жөнелтілімдер негізінде қайта есептеу жүргізілгеннен кейін көшбасшылар мен аутсайдерлер құрамы өзгерді.
Шын мәнінде бірінші орынға бірден екі сатыға жоғарылаған Шығыс Қазақстан облысы шықты. Екінші және үшінші орындарды Қарағанды және Павлодар облыстары иеленді. Негізінен Қазақстанның индустриялық өзегі саналатын бұл өңірлер көмір өндіру мен металлургия салаларының арқасында басымдығын сақтап қалды, – деп түсіндірді сарапшылар.
