Республика күніне орай ШҚО Катонқарағай ауданында жаңа әлеуметтік нысандар ашылды
Республика күні қарсаңында Катонқарағай ауданының тұрғындары екі бірдей көптен күткен сыйлыққа ие болды – Топқайын ауылында жаңа ауызсу жүйесі пайдалануға беріліп, аудан орталығында заманауи дене шынықтыру-сауықтыру кешені ашылды.
Топқайындықтар үшін бұл оқиға ерекше маңызға ие. Көп жылдан бері алғаш рет ауылға таза, сапалы ауыз су жеткізу жүйесі іске қосылды. Енді су әр үйге тұрақты түрде беріліп, ауыл тұрғындарының тұрмыс сапасы айтарлықтай жақсаратын болады.
Ауызсу желісін жаңғырту жұмыстары 2021 жылдан бері жүргізіліп, облыс басшылығы мен құқық қорғау органдарының ерекше бақылауында болды. Негізгі қиындық артезиан ұңғымасын бұрғылау кезінде туындады – қатты жартас қабаттарының кесірінен техника тәулігіне небары 20–30 сантиметрге ғана жылжып отырды. Облыс әкімі Нұрымбет Сақтағановтың тапсырмасымен жобаны жүзеге асыруға сенімді қосалқы мердігер тартылып, құрылыс қарқыны жеделдетіліп, нысан уақытылы аяқталды.
Тағы бір маңызды жаңалық – Катонқарағай ауылында дене шынықтыру-сауықтыру кешенінің ашылуы. Бұл нысан өңірдегі ең көп талқыланған ұзақ құрылыстардың бірі болған еді. Облыс басшылығының қолдауы мен мердігер ұйымдардың жүйелі жұмысының арқасында құрылыс сәтті аяқталды.
Жаңа кешенде заманауи спорт залдары, киім ауыстыратын бөлмелер және түрлі спорт түрлерімен айналысуға арналған орындар бар. Ол жастар мен спорт сүйер қауым үшін тартылыс орталығына айналып, бұқаралық спортты дамыту мен салауатты өмір салтын қалыптастыруға мүмкіндік береді.
Осылайша, елдің басты мерекесі қарсаңында Катонқарағай ауданының тұрғындары күнделікті өмір сапасын арттыратын және өңірдің оң өзгерістерін бейнелейтін екі маңызды нысанға қол жеткізді.
