Ұлытау облысында экономикалық даму мен инвестициялық әлеуетті арттыруға бағытталған шаралар талқыланды
Ұлытау облысының әкімі Дастан Рыспековтің төрағалығымен өткен аппарат жиынында өңірдің стратегиялық маңызды салалары — спорт инфрақұрылымын дамыту, бұқаралық спортты қолдау, сонымен қатар геология және жер қойнауын пайдалану салаларын цифрландыру және жетілдіру мәселелері жан-жақты қаралды.
Кеңес барысында облыс басшысы тұрғындардың салауатты өмір салтын ұстануы және бұқаралық спортты дамыту үшін облыстың әрбір елді мекенінде заманауи спорт нысандарының болуы маңызды екенін ерекше атап өтті. Осыған орай, әкім 2026–2028 жылдарға арналған спорт инфрақұрылымын дамыту жөніндегі кешенді жол картасын әзірлеуді тапсырды. Бұл бастама өңірдегі спорттық секторды дамыту арқылы жаңа жұмыс орындарын құруға, жастардың еңбекке ынтасын арттыруға және экономикалық белсенділікті көтеруге мүмкіндік береді.
Сонымен қатар ауылдық жерлерде жаттықтырушы-нұсқаушылардың санын арттыру, жасанды жамылғысы бар футбол алаңдарын орнату, спорттық клубтар мен мектептерде заманауи жабдықтармен қамтамасыз ету жұмыстары күшейтілді. Бұл шаралар туризмді дамытуға, аймаққа келетін инвестицияны көбейтуге және жергілікті кәсіпкерліктің дамуына серпін береді.
Жиында геология және жер қойнауын пайдалану саласына да ерекше көңіл бөлінді. Облыс әкімі бұл бағыт өңірдің ресурстық әлеуетін айқындайтын маңызды сала екенін атап өтіп, қазба байлықтарды тиімді игеру үшін барлау сапасын арттыру, минералды қорларды басқаруды жетілдіру, сондай-ақ пайдалы қазбаларды заңсыз өндіру деректері анықталған жағдайда құқық қорғау органдарына жедел хабарлау міндетін қойды.
Мұндай шаралар өңірдің инвестициялық тартымдылығын арттырып, экономиканы әртараптандыруға, өндірістік қуатты ұлғайтуға және ұлттық өнім сапасын жақсартуға жол ашады. Сондай-ақ, цифрлық технологияларды енгізу мен инфрақұрылымды модернизациялау арқылы өңірде экономикалық тиімділікті арттыруға, инвестициялық жобаларды іске асыруға және елдің экономикалық тұрақтылығын қамтамасыз етуге мүмкіндік жасалады.
Облыс әкімінің тапсырмасымен алдағы уақытта өңірде экономикалық даму мен әлеуметтік-экономикалық көрсеткіштерді жақсарту мақсатында нақты жоспарлар әзірленіп, олардың іске асырылуы қатаң бақылауға алынды. Бұл шаралар Ұлытау облысының экономикалық әлеуетін арттыруға және аймақ тұрғындарының өмір сүру сапасын жақсартуға бағытталған маңызды қадам болып табылады.
