Жаңаарқада бокстан Айбат Амановты еске алуға арналған турнир басталды

Жаңаарқа ауданының Модуль спорттық кешенінде бокстан жасөспірімдер арасында Айбат Амановты еске алуға арналған Ұлытау облысының III ашық облыстық турнирі басталды. 5-8 мамыр аралығында өтетін бұл дүбірлі додаға әр өңірден жас былғары қолғап шеберлері қатысып, өз шеберліктерін ортаға салмақ.

Аталған турнир – Қазақстан Республикасы Ұлттық Ұланының батыры, III дәрежелі “Айбын” орденінің иегері Аманов Айбат Ерболұлын еске алуға арналған. Ел қорғауда ерлік көрсеткен, өшпес өнеге қалдырған батырдың есімі – жас ұрпаққа үлгі, ел жадында мәңгі. Осы жарыс арқылы ұйымдастырушылар оның ерлігін дәріптеп, есімін жас буын санасына сіңіруді көздейді.

Турнирдің басты мақсаты – салауатты өмір салтын ұлықтау, жасөспірімдер арасында боксты дамыту, патриоттық рухты ояту, батырды еске алып, тағзым ету. Бұл жарыс – жас спортшылардың шеберлігін шыңдап, оларды отансүйгіштікке, ерлік пен табандылыққа тәрбиелеуге бағытталған рухани мәні зор шара.