Ұлытау облысында интернет-алаяқтықтың алдын алу шаралары күшейтілуде
Ұлытау облысында 2025 жылы интернет-алаяқтық деректері 179%-ға артқан. Атап айтқанда, қылмыс саны 121-ден 313-ке дейін өсіп, соның салдарынан жәбірленушілерге 500 млн теңгеден астам материалдық залал келтірілген.
Осыған байланысты Ұлытау облысының прокуратурасымен интернет-алаяқтықтың алдын алуға бағытталған үйлестіру және превентивтік шаралардың кешені қабылдануда. Бұл ретте құқық қорғау органдарының, мемлекеттік мекемелердің, кәсіпорындардың және бұқаралық ақпарат құралдарының өзара іс-қимылына ерекше мән берілуде. Негізгі мақсат – тұрғындардың қаржылық және құқықтық сауаттылығын арттыру, алаяқтық әрекеттердің кең таралған тәсілдері туралы уақтылы ақпарат беру және осындай құқық бұзушылықтардың алдын алу.
Ерекше назар халықпен және еңбек ұжымдарымен жүргізілетін профилактикалық жұмысқа аударылуда. Тиімді бағыттардың бірі – кәсіпорын қызметкерлерімен түсіндіру кездесулерін өткізу. Атап айтқанда, «Қазақмыс корпорациясы» ЖШС ұжымдарымен белсенді жұмыс жүргізілуде. Өткен жылы ауқымды ақпараттық-түсіндіру іс-шаралары ұйымдастырылып, ағымдағы жылы бұл жұмыс жүйелі түрде жалғасуда.
Осы бағыттағы кезекті түсіндіру кездесуі облыс прокуратурасымен Қ.И. Сәтбаев атындағы «Жезқазған тау-кен өндірісі» құю-механикалық зауытының еңбек ұжымымен ұйымдастырылды. Кездесу барысында қызметкерлерге интернет-алаяқтықтың кең таралған схемалары, оның ішінде банк қызметкері, полиция немесе өзге де ресми орган өкілі ретінде хабарласу, күмәнді сілтемелер жолдау, жалған несие рәсімдеу, сондай-ақ жалған инвестициялық жобалар мен оңай табыс табуға шақыратын алаяқтық ұсыныстар туралы жан-жақты түсіндірілді.
Сонымен қатар азаматтарға интернет кеңістігінде жеке деректерді қорғау, бейтаныс адамдарға банк картасының деректерін, SMS-кодтарды және құпия сөздерді бермеу, тексерілмеген қосымшалар мен сілтемелерге өтпеу, сондай-ақ күмәнді қаржылық операциялар кезінде дереу банкке немесе құқық қорғау органдарына жүгіну қажеттігі ескертілді.
Кездесу барысында интернет-алаяқтардың жиі қолданатын психологиялық ықпал ету тәсілдері де түсіндірілді. Атап айтқанда, азаматтарды асықтыру, қорқыту, жалған ақпарат арқылы қысым көрсету, «шұғыл шешім қабылдау қажет» деген әсер қалыптастыру сынды әдістердің қауіптілігіне назар аударылды.
Қабылданған шаралардың нәтижесінде 2026 жылдың бірінші тоқсанында жағдайды тұрақтандыруға қол жеткізілді: интернет-алаяқтық деңгейі өткен жылдың осы кезеңімен бірдей деңгейде сақталды — 41 факт.
Бұл бағыттағы жұмыс алдағы уақытта да жалғасатын болады және халықтың құқықтық сауаттылығын арттыруға, азаматтардың сақтық мәдениетін қалыптастыруға, сондай-ақ интернет-алаяқтық саласындағы қылмыс деңгейін төмендетуге бағытталады.
